Heit dir ghört, im Schwyzerländli passiere kurligi Sache,

mi red dervo bis z'hingersch im Wyssache!

 

Es geit um die Seniore SAC-ler, o weh,

die gienge ändi Horner, immer a Bielersee!

 

Si fahre häre, mit e me chline Car,

derwile Würscht scho bade, im heisse Marc!

 

Si stiege us, Frau und Mann,

mi seit, si sige im Dörfli Twann!

 

Si loufe füre, ume Rank,

gottfriedstutz, was isch das hie, für ne cheibe Gstank!

 

Das schmöckt ja hie, wie ire Schnapsbrönnerei,

das ich doch würklech, e Sauerei!

 

Nume, liebi Lüt, hie wärde ire grosse Chuchi, gmacht die herrliche Delikatässe,

wo dir aui hie, weid cho ässe!

 

Si rümpfe ihrer fine Näsli,

u gö witers, dür das stille Gässli!

 

E Tür geit uf, u si si verschwunde,

mi seit, mi heigse bisch spät am Abe, nüme gfunde!

 

Drinne i dr Winzerstube, isch es warm u zfriede,

dr Empfang, härzlech und gediege!

 

Tische si deckt, u aus isch parat,

Wy gits, Rote, Wysse, u grossi Schüssle, mit Härdöpfusalat!

 

Itz wird afe öppis trunke, u es wird cheibe luschtig,

macht euch das Ganze, nid o e chli gluschtig!

 

Doch plötzlich wirds mugs-müsli still,

Dr Chef tritt uf, im grosse Stil!

 

Z'oberst uf dr Gable, trohnt e Wurscht, wo hett bloderet, im heisse Marc,

u aui rüefe, oh, oh, oh, das schmöckt ja ganz wunderbar!

 

Itz wird gässe u trunke,

u wes Musig hätt, würde si derzue, no schunkle!

 

Es isch klar, jedi Frou u Jedermann,

trinkt vo däm edle Räbesaft, vo hie, vo Twann!

 

Aber oh Schreck, i chas gar nid gloube,

oder sie äch miner Ouge, scho am verstoube!

 

Da hett doch Eine, näb sim Täuer,

e ganzi Fläsche Appizäuer!

 

Ja, mir hoffe nume, dä gueti Ma, chöm de o wieder guet hei,

u stogli ungerwägs, nid no, überne grosse Stei!

 

Dir gseht, dä Tag ich wieder einisch prächtig glunge,

trotzdäm, das dr eint oder anger, afe red, mit e chli schwärer Zunge!

 

Ja, das isch se gsi, di Gschicht vo de Huttu SAC-Seniore,

wo Land uf und ab, hei gsorgt für so grossi Furore!

 

Drum, dir wüssets aui, das wärs äbe gsi, das Träberwurstässe,

u tüet, im nächschte Jahr, das Datum, ja nid vergässe!

 

Drum hett dr Ueli Sommer, dr Gaschtwirt u siner Lüt, für dä herrlich Schmaus,

verdient vo üs, es Dankeschön, und e riesige, grosse Applaus!

 

R.Zwahlen